‘मुफ्त में ठगी’ कविता का अनुवाद

സൗജന്യം 

---

ടി. ശിവന്‍കുട്ടി.

ജി.വി.എഛ്.എസ്.എസ്. മമ്പാട്.

http://www.hindisopan.blogspot.com

വായിക്കുകയും അഭിപ്രായങ്ങളും നിര്‍ദ്ദേശങ്ങളും അറിയിക്കുകയും കമന്റിടുകയും ചെയ്യുക.

---

 സാമോദം വാങ്ങിപ്പോന്നു

വൃദ്ധന്‍ കൃഷിക്കാരന്‍ നല്‍-

വിത്തൊരു ചാക്കും

രാസവളങ്ങള്‍ രണ്ടു ചാക്കും.

വീട്ടിലെത്തി നോക്കവേ

നെഞ്ചകം പൊള്ളിപ്പോയി

മൂന്നു ചാക്കിലും മായ-

മഞ്ചഞ്ചു കിലോ വീതം!

ഇത്രയും കാലം മായം

വ്യക്തമല്ലെന്നാ,ലിന്നോ.....?

പകല്‍ പോലെ പറ്റിക്കാന്‍                    

തെല്ലു പോരാ ചങ്കൂറ്റം!

വിശന്നും തളര്‍ന്നും കാ-

ലേന്തിയേന്തി വച്ചു മാ-

പാവം വിയര്‍ത്തൊലിച്ചും

മൈലുകള്‍ താണ്ടിച്ചെന്നു

തിരികെ പട്ടണത്തില്‍

കടയില്‍ ചോദിക്കുവാ-

“നെന്തിനു വിശ്വാസത്തെ

നിര്‍ദ്ദയം ചതിച്ചു നീ?”

ചിരിച്ചു കടക്കാരന്‍

സ്തംബ്ധനായ് കൃഷിക്കാരന്‍

“സുഹൃത്തേ! ചതിയതി-

ലില്ല ഞാന്‍ നിനക്കായി

തന്നതൊരുപഹാരം,

ഉപഹാരം മാത്രം! ഞാ-

നതിനാ,യില്ല, പണം

വസൂലാക്കിയിട്ടില്ല.

  

അറിയുന്നുവല്ലോ നീ

സൗജന്യമായ് കിട്ടുന്നു

ഒരു പായ്കറ്റ് ചായ-

പ്പൊടിയോടൊപ്പം കപ്പും.

സോപ്പു വാങ്ങിയാല്‍ സ്പൂണും

കാപ്പി വാങ്ങിയാല്‍ പേന

ടൂത്തു പേസ്റ്റിനോടൊപ്പം

ബ്രഷും സൗജന്യം തന്നെ.

അത്രയേയുള്ളൂ! ഞാനും

സൌജന്യമായ്ത്തന്നതാ-

ണച്ചതിയൊരു ദിന-

മുപകാരപ്പെട്ടേയ്ക്കാം”

തുഷ്ടനായ് കൃഷിക്കാരന്‍

മടങ്ങിപ്പോയി വീട്ടില്‍.

“സൗജന്യമായല്ലേ! കൊള്ളാം

ചതി, യെങ്കി, ലാകട്ടെ.

ലോകത്തങ്ങനെയൊരു

വസ്തുവി,ല്ലാര്‍ക്കെങ്കിലും

ഉപകാരമില്ലാതെ,

ഉപയോഗമില്ലാതെ!”

  

ടി. ശിവന്‍കുട്ടി.

ജി.വി.എഛ്.എസ്.എസ്. മമ്പാട്.

http://www.hindisopan.blogspot.com

വായിക്കുകയും അഭിപ്രായങ്ങളും നിര്‍ദ്ദേശങ്ങളും അറിയിക്കുകയും കമന്റിടുകയും ചെയ്യുക.